اعداد كريم اسماعيل
................................................
الناس الطيبة، اكتر ناس عندها شعور بالذنب.
خلال ال٨ سنين اللي فاتوا من اكتر الحاجات اللي بستغربها هو إن دايمًا من اكبر الضغوط اللي تاعبة الناس الطيبة هي شعورهم بالذنب..
شعور بالذنب تجاه حد طلب مساعدة وماقدروش يساعدوه
شعور بالذنب تجاه حد طلب مساعدة وساعدوه .. بس مش حاسين انهم ساعدوه كفاية أو إن مشكلته لسه ماتحلتش
شعور بالذنب تجاه حبايبهم اللي مقصرين في حقهم
شعور بالذنب تجاه ربنا وتقصيرهم وذنوبهم
شعور بالذنب تجاه الحاجات اللي بيتأخروا عليها او مش بيعرفوا ينجزوها عشان طول الوقت هما بيعملوا حاجة بيساعدوا فيها حد تاني، وده طبعًا عشان لو ما ساعدهوش هيحسوا بالذنب..
فهما دايمًا بين دوامة الشعور بالذنب
يا تجاه الناس .. يا تجاه ربنا .. ياتجاه نفسهم
ومش عارفين يخرجوا من الدايرة دي
واساس المشكلة كله في إنهم طيبين ومهتمين.
الشعور بالذنب من أنبل المشاعر السلبية
هو أحد أهم المشاعر اللي بتحافظ علينا إننا نكون "طيبين وصالحين"
ولكن للأسف زيه زي كل المشاعر السلبية
على قد ما معناه نبيل وعظيم على قد ما الفهم الخاطئ ليه واستخدامه بشكل غير صحيح
ممكن يسبب ضغوط نفسية شديدة جداً، بل أحياناً ممكن يضغط الإنسان لحد ما يصل لحالات إحباط شديدة!
لو انت من الناس الطيبين دول، مهم انك تهتم بصحتك النفسية وتاخد أول خطوة انك تتعلم عنها، وتفهم المشاعر دي وإزاي تخليها تساعدك تعيش حياة أفضل.